ప్రభుత్వ వైద్యంలో తొలి ఐవీఎఫ్ శిశువు — గాంధీ ఆస్పత్రి వైద్యుల అద్భుతం

హైదరాబాద్: సికింద్రాబాద్‌లోని గాంధీ ఆస్పత్రి వైద్యులు ప్రభుత్వ రంగంలో అరుదైన విజయాన్ని నమోదు చేశారు. ఐవీఎఫ్ (ఇన్ విట్రో ఫెర్టిలైజేషన్) పద్ధతిలో ఒక మహిళకు సాఫల్యంగా ప్రసవం నిర్వహించి ఆడబిడ్డకు జన్మనివ్వించారు. ప్రభుత్వ ఆస్పత్రిలో ఐవీఎఫ్ ద్వారా జన్మించిన తొలి శిశువుగా ఇది ప్రత్యేకత సాధించింది.

అల్వాల్‌కు చెందిన శృతి అనే మహిళకు ఫిబ్రవరి 7న వైద్యులు విజయవంతంగా డెలివరీ నిర్వహించారు. తల్లీబిడ్డ ఇద్దరూ క్షేమంగా ఉన్నారు. ఫిబ్రవరి 25న ఆమెను ఆస్పత్రి నుంచి డిశ్చార్జ్ చేశారు.

ప్రైవేట్ ఆస్పత్రుల్లో రూ.10 నుంచి 15 లక్షల వరకు ఖర్చయ్యే ఐవీఎఫ్ చికిత్సను గాంధీ వైద్యులు పూర్తిగా ఉచితంగా అందించడం విశేషం. ఆర్థికంగా వెనుకబడిన దంపతులకు ఇది పెద్ద వరంగా మారింది.

ఈ విజయాన్ని సాధించిన గాంధీ వైద్య బృందాన్ని డీఎంఈ డా. నరేంద్ర కుమార్ అభినందించారు. గాంధీతో పాటు పెట్లబుర్జు, వరంగల్, ఆదిలాబాద్ రిమ్స్‌లలో కూడా ఐవీఎఫ్ సెంటర్లు ఏర్పాటు చేసినట్లు తెలిపారు.

రాష్ట్ర ప్రభుత్వ దవాఖానల్లో తొలిసారిగా ఐవీఎఫ్ సేవలు 2024 అక్టోబర్ 15న ప్రారంభమయ్యాయి. గాంధీ ఆస్పత్రి ఎంసీహెచ్ భవనంలోని ఫెర్టిలిటీ సెంటర్‌ను వైద్య, ఆరోగ్యశాఖ మంత్రి దామోదర రాజనర్సింహ ప్రారంభించిన విషయం తెలిసిందే.

ఇప్పటి పరిస్థితుల్లో సంతానం కోసం లక్షలు ఖర్చు చేసే దంపతులకు ప్రభుత్వ ఆస్పత్రిలో ఉచిత ఐవీఎఫ్ సేవలు అందుబాటులోకి రావడం ఆశాజనక పరిణామంగా వైద్య నిపుణులు భావిస్తున్నారు. ప్రభుత్వ వైద్య రంగంలో ఇది ఒక మైలురాయిగా నిలిచింది.