క్రషర్ విధానంతో ఖనిజ ఆదాయాల్లో భారీ వృద్ధి.. ఆరోపణలు నిరాధారం

నవంబర్ 2025లో కాంగ్రెస్ ప్రభుత్వం ప్రవేశపెట్టిన కొత్త క్రషర్ విధానం రాష్ట్ర ఖనిజ ఆదాయాలను గణనీయంగా పెంచిందని తాజా గణాంకాలు వెల్లడిస్తున్నాయి. ఈ విధానం అమల్లోకి వచ్చిన కేవలం నాలుగు నెలల్లోనే పర్మిట్ ఫీజు ద్వారా 63 శాతం వృద్ధి నమోదు కాగా, సీనియరేజ్ ఫీజు 79 శాతం పెరిగింది.

డిసెంబర్ 2025లో పర్మిట్ ఫీజు వృద్ధి 60 శాతంగా ఉండగా, సీనియరేజ్ ఫీజు 81 శాతం పెరిగింది. జనవరి 2026లో ఈ వృద్ధి మరింత వేగం అందుకుని, పర్మిట్ ఫీజు 73 శాతం, సీనియరేజ్ ఫీజు 96 శాతం పెరిగాయి. ఫిబ్రవరి 2026లో ఈ సంఖ్యలు ఇంకా పెరిగి, పర్మిట్ ఫీజు 83 శాతం, సీనియరేజ్ ఫీజు 97 శాతం వృద్ధిని సాధించాయి.

ఈ గణాంకాలు కాంగ్రెస్ ప్రభుత్వం ఖనిజ రంగంలో ఆదాయాన్ని భారీగా పెంచి, రాష్ట్ర ఖజానాకు బలమైన ఆదాయ వనరులు సృష్టించిందని స్పష్టం చేస్తున్నాయి. అక్రమ ఖననాన్ని అరికట్టడంలో ప్రభుత్వం కీలక చర్యలు తీసుకుంది. ముఖ్యంగా విద్యుత్ వినియోగంపై ఆధారపడి ఫీజు విధించే పారదర్శక విధానాన్ని అమలు చేస్తోంది. ఇదే విధానం ఇతర రాష్ట్రాల్లో కూడా అమల్లో ఉండటం గమనార్హం.

ఇప్పటివరకు రాష్ట్ర ప్రభుత్వం జరిమానాల రూపంలో ₹7.87 కోట్లు వసూలు చేసింది. మైనర్ మినరల్స్ ద్వారా 34 శాతం ఆదాయ వృద్ధి నమోదైంది. అదనంగా, ఇసుక తవ్వకాల ద్వారా దాదాపు ₹1,000 కోట్లు సమకూర్చుకోగా, గత ఏడాది ఇది ₹700 కోట్లుగా ఉంది.

డీజిల్‌తో నడిచే క్రషర్ల విషయంలో కొన్ని యూనిట్లకు ప్రభుత్వం అనుమతులు ఇచ్చింది. ఈ అంశంపై వచ్చిన అభ్యంతరాల నేపథ్యంలో అధికారులు, జిల్లా కలెక్టర్లకు తగిన చర్యలు తీసుకోవాలని ఇప్పటికే ఆదేశాలు జారీ చేశారు. ఎక్కడైనా ఉల్లంఘనలు జరిగితే కాలుష్య నియంత్రణ మండలి కఠిన చర్యలు తీసుకుంటుందని స్పష్టం చేశారు.

మొత్తంగా, ఖనిజ రంగంలో ఆదాయం తగ్గిందన్న ఆరోపణలు వాస్తవానికి విరుద్ధమని, ప్రభుత్వ చర్యలతో ఆదాయం నిరంతరం పెరుగుతోందని ఈ గణాంకాలు తేటతెల్లం చేస్తున్నాయి.