RBI బంగారం కొంటోంది.. ప్రజలు మాత్రం కొనొద్దా?

మోదీ పిలుపుతో దేశంలో కొత్త చర్చ.. అసలు కారణం ఇదే!

దేశంలో ప్రస్తుతం ఆసక్తికరమైన ఆర్థిక చర్చ మొదలైంది. ఒకవైపు భారతీయ రిజర్వ్ బ్యాంక్ (RBI) భారీగా బంగారం నిల్వలు పెంచుకుంటుంటే.. మరోవైపు ప్రధాని Narendra Modi మాత్రం ప్రజలు ఏడాది పాటు బంగారం కొనకుండా ఉండాలని సూచించారు. దీంతో “RBIకి ఓకే.. సామాన్యులకు నోనా?” అనే ప్రశ్నలు వినిపిస్తున్నాయి.

ప్రధాని మోదీ ఇటీవల హైదరాబాద్ సభలో మాట్లాడుతూ.. దేశ విదేశీ మారక ద్రవ్య నిల్వలను కాపాడేందుకు అవసరం లేని బంగారం కొనుగోళ్లు, విదేశీ పర్యటనలు తగ్గించాలని పిలుపునిచ్చారు. పెరుగుతున్న క్రూడ్ ఆయిల్ ధరలు, పశ్చిమాసియా ఉద్రిక్తతలు, దిగుమతుల భారంతో దేశ ఆర్థిక వ్యవస్థపై ఒత్తిడి పెరుగుతోందని చెప్పారు.

అయితే ఇదే సమయంలో RBI మాత్రం గోల్డ్ రిజర్వ్స్‌ను వేగంగా పెంచుతోంది. 2024లోనే భారత్ 72.6 టన్నుల బంగారం కొనుగోలు చేసి ప్రపంచంలో రెండో అతిపెద్ద కొనుగోలుదారుగా నిలిచింది. 2026 మార్చి నాటికి భారత విదేశీ మారక నిల్వల్లో గోల్డ్ వాటా 16.7 శాతానికి చేరింది. ప్రస్తుతం RBI వద్ద 880 టన్నులకు పైగా బంగారం నిల్వలున్నట్లు నివేదికలు చెబుతున్నాయి.

ఆర్థిక నిపుణుల ప్రకారం.. RBI కొనుగోలు చేసే బంగారం దేశ భద్రత కోసం “స్ట్రాటజిక్ రిజర్వ్”. ప్రపంచవ్యాప్తంగా “డీ-డాలరైజేషన్” ట్రెండ్ పెరుగుతుండటం, భౌగోళిక రాజకీయ ఉద్రిక్తతలు అధికమవడం వల్ల డాలర్‌పై ఆధారాన్ని తగ్గించేందుకు కేంద్ర బ్యాంకులు గోల్డ్ నిల్వలు పెంచుతున్నాయి. ఏ దేశ కరెన్సీకి బంధించని సురక్షిత ఆస్తిగా బంగారాన్ని భావిస్తున్నారు.

కానీ ప్రజలు భారీగా బంగారం కొంటే పరిస్థితి వేరు. భారత్‌లో అవసరమయ్యే బంగారంలో దాదాపు 90 శాతం దిగుమతుల ద్వారానే వస్తోంది. దీంతో డాలర్లలో చెల్లింపులు చేయాల్సి వస్తుంది. క్రూడ్ ఆయిల్ తర్వాత దేశ విదేశీ మారక ద్రవ్యాన్ని ఎక్కువగా ఖర్చు చేయించే దిగుమతి వస్తువు బంగారమే. ప్రజల కొనుగోళ్లు పెరిగితే ట్రేడ్ డెఫిసిట్ పెరిగి రూపాయి విలువపై ఒత్తిడి పడే ప్రమాదం ఉందని ఆర్థికవేత్తలు చెబుతున్నారు.

మోదీ వ్యాఖ్యల ప్రభావం మార్కెట్‌పైనా కనిపించింది. బంగారం ధరలు స్వల్పంగా పడిపోగా, జ్యువెలరీ కంపెనీల షేర్లు కూడా నష్టాల్లో ముగిశాయి. అయితే నిపుణులు మాత్రం దీన్ని తాత్కాలిక ప్రభావంగానే చూస్తున్నారు. ప్రపంచ అనిశ్చితి కొనసాగుతున్నంతకాలం బంగారంపై దీర్ఘకాలిక డిమాండ్ కొనసాగుతుందని చెబుతున్నారు.