గజ్వేల్లో 3,266 మందికి కొత్త పింఛన్లు.. 390 మందికి ఇందిరమ్మ ఇళ్ల పట్టాలు
రెండో విడతలో మరో 2 వేల ఇందిరమ్మ ఇళ్లు మంజూరు
పేదల సొంతింటి కల సాకారం చేయడమే ప్రజా ప్రభుత్వ లక్ష్యం: మంత్రి వివేక్ వెంకటస్వామి
గజ్వేల్, నవంబర్ 16: అర్హులైన ప్రతి ఒక్కరికీ చేయూత పింఛన్లు అందించడంతో పాటు పేదల సొంతింటి కలను సాకారం చేయడమే ప్రజా ప్రభుత్వ లక్ష్యమని శక్తి, గనుల శాఖ మంత్రి డాక్టర్ గడ్డం వివేక్ వెంకటస్వామి అన్నారు. సోమవారం గజ్వేల్లోని మహతి ఆడిటోరియంలో జిల్లా కలెక్టర్ కె. హైమావతితో కలిసి నిర్వహించిన కార్యక్రమంలో 3,266 మంది లబ్ధిదారులకు కొత్త చేయూత పింఛన్ల మంజూరు పత్రాలు, రెండో విడతలో 390 మందికి ఇందిరమ్మ ఇళ్ల పట్టాలను పంపిణీ చేశారు. మైనారిటీ సంక్షేమ శాఖ ఆధ్వర్యంలో మహిళలకు కుట్టు మిషన్లను అందజేశారు.
ఈ సందర్భంగా మంత్రి మాట్లాడుతూ.. అర్హులైన ప్రతి ఒక్కరికీ పింఛన్లు అందిస్తామని, ఎవరూ ఆందోళన చెందాల్సిన అవసరం లేదని భరోసా ఇచ్చారు. గతంలో వితంతువులు, దివ్యాంగులకు మాత్రమే పింఛన్లు అందేవని, ప్రజా ప్రభుత్వం ఒంటరి మహిళలు, గీత కార్మికులు, చేనేత కార్మికులకు సైతం చేయూత పింఛన్లు అందిస్తోందని తెలిపారు.
ప్రజలకు ఇచ్చిన మాట ప్రకారం పేదల సొంతింటి కలను నెరవేరుస్తున్నామని పేర్కొన్నారు. గజ్వేల్ నియోజకవర్గానికి మొదటి విడతలో 3,500 ఇందిరమ్మ ఇళ్లు మంజూరు చేయగా, రెండో విడతలో మరో 2 వేల ఇళ్లు మంజూరు చేయనున్నట్లు వెల్లడించారు. రాష్ట్రవ్యాప్తంగా ఇప్పటికే 2 లక్షల ఇందిరమ్మ ఇళ్ల నిర్మాణాలు పూర్తి చేసి పేదలకు అందించినట్లు తెలిపారు.
మొదటి విడతలో ఇళ్లు పొందిన లబ్ధిదారులు సొంతింటిలో సంతోషంగా జీవిస్తున్నారని, దీపావళి సందర్భంగా వారి ఇళ్లలో పండుగ జరుపుకోవడం, సొంతింటి ఆనందంతో వారి ముఖాల్లో కనిపించిన సంతోషాన్ని చూడటం ఎంతో ఆనందాన్నిచ్చిందని మంత్రి పేర్కొన్నారు.
ప్రజా ప్రభుత్వం అమలు చేస్తున్న సంక్షేమ పథకాలు పేద కుటుంబాలకు ఆర్థిక భరోసా కల్పిస్తున్నాయని తెలిపారు. సంక్షేమంతో పాటు అభివృద్ధికి కూడా ప్రభుత్వం సమాన ప్రాధాన్యత ఇస్తోందన్నారు. సిద్దిపేట జిల్లాలో మహిళా సంఘాలకు రూ.330 కోట్ల వడ్డీలేని రుణాలు అందించినట్లు వెల్లడించారు. రూ.200 కోట్లతో యంగ్ ఇండియా ఇంటిగ్రేటెడ్ రెసిడెన్షియల్ స్కూల్ మంజూరు చేశామని, వచ్చే ఏడాది నాటికి భవన నిర్మాణం పూర్తి చేసి విద్యార్థులకు అందుబాటులోకి తీసుకొస్తామని తెలిపారు.
యువతకు ఉపాధి అవకాశాలు కల్పించేందుకు అడ్వాన్స్డ్ టెక్నాలజీ సెంటర్లను ఏర్పాటు చేస్తున్నామని, వీటి ద్వారా ఆధునిక సాంకేతిక నైపుణ్యాల్లో శిక్షణ ఇచ్చి ఉద్యోగ అవకాశాలు కల్పిస్తున్నామని చెప్పారు. టామ్కామ్ ద్వారా విదేశాల్లోనూ తెలంగాణ యువతకు ఉద్యోగ అవకాశాలు కల్పిస్తున్నట్లు వివరించారు.
ఎమ్మెల్సీ యాదవరెడ్డి మాట్లాడుతూ.. గతంలో వితంతువులు, దివ్యాంగులకు మాత్రమే పింఛన్లు అందేవని, ప్రస్తుతం ఒంటరి మహిళలు, గీత కార్మికులు, చేనేత కార్మికులకు సైతం పింఛన్లు అందించడం సంతోషకరమన్నారు. గజ్వేల్ నియోజకవర్గ అభివృద్ధికి మంత్రి సహకరించాలని కోరారు.
ఈ కార్యక్రమంలో గజ్వేల్ ఆర్డీవో చంద్రకళ, మున్సిపల్ చైర్పర్సన్, ఇతర ప్రజాప్రతినిధులు, అధికారులు, లబ్ధిదారులు పాల్గొన్నారు.
