పేదల సొంతింటి కలను సాకారం చేస్తున్న ప్రజా ప్రభుత్వం

అర్హులైన నిరుపేదలకే ఇందిరమ్మ ఇళ్లు.. రెండో విడతలో త్వరలో మరిన్ని ఇళ్ల మంజూరు

మొదటి విడతలో మంజూరైన 3,500 ఇళ్లలో 2,500కు పైగా పూర్తి

కోహెడలో ఇందిరమ్మ ఇంట్లో దీపావళి వేడుకల్లో పాల్గొన్న మంత్రి పొన్నం ప్రభాకర్

హుస్నాబాద్, నవంబర్ 9: పదేళ్ల తర్వాత పేదల సొంతింటి కలను సాకారం చేసేందుకు ప్రజా ప్రభుత్వం ఇందిరమ్మ ఇళ్ల పథకాన్ని అమలు చేస్తోందని రాష్ట్ర మంత్రి పొన్నం ప్రభాకర్ అన్నారు. అర్హత కలిగిన నిరుపేదలకు మాత్రమే ఇళ్లు మంజూరు చేస్తున్నామని, లబ్ధిదారుల ఎంపికలో పారదర్శకత పాటిస్తున్నామని తెలిపారు. మొదటి విడతలో మంజూరైన ఇళ్ల నిర్మాణాలు వేగంగా పూర్తిచేయాలని, త్వరలో రెండో విడత ఇళ్లను కూడా మంజూరు చేస్తామని వెల్లడించారు.

సిద్దిపేట జిల్లా కోహెడ మండలంలో సోమవారం ఇందిరమ్మ ఇళ్ల లబ్ధిదారు పార్నంది శంకరవ్వ నూతన గృహాన్ని మంత్రి ప్రారంభించారు. అనంతరం ఆమెకు నూతన వస్త్రాలు అందజేసి దీపావళి శుభాకాంక్షలు తెలిపారు. లబ్ధిదారు కుటుంబంతో కలిసి నూతన ఇందిరమ్మ ఇంట్లో దీపావళి వేడుకల్లో పాల్గొని టపాసులు కాల్చి సంబరాలు చేసుకున్నారు.

ఈ సందర్భంగా మంత్రి పొన్నం ప్రభాకర్ మాట్లాడుతూ.. గత పదేళ్లుగా పేదలకు ఇళ్లు మంజూరు చేయకపోవడంతో అర్హులైన లబ్ధిదారుల సంఖ్య పెరిగిందన్నారు. పేదలకు సొంత ఇల్లు నిర్మించుకునేందుకు ప్రభుత్వం రూ.5 లక్షల ఆర్థిక సాయం అందిస్తోందని తెలిపారు. హుస్నాబాద్ నియోజకవర్గంలో మొదటి విడతలో 3,500 ఇందిరమ్మ ఇళ్లు మంజూరు కాగా, ప్రస్తుతం మరో 2,000 ఇళ్లకు అనుమతులు లభించాయని చెప్పారు. లబ్ధిదారుల ఎంపికలో అత్యంత పేదలకు, అర్హులైన కుటుంబాలకు ప్రాధాన్యత ఇస్తున్నామన్నారు.

అర్హత లేని వారికి ఇళ్లు కేటాయించడం సాధ్యం కాదని, పేదల్లో నిజమైన నిరుపేదలను గుర్తించి వారికి ఇళ్లు అందిస్తామని స్పష్టం చేశారు. హుస్నాబాద్ నియోజకవర్గంలో ఇందిరమ్మ ఇళ్ల కేటాయింపు ప్రక్రియ అత్యంత పారదర్శకంగా జరిగిందని తెలిపారు.

మొదటి విడతలో మంజూరైన 3,500 ఇళ్లలో ఇప్పటికే 2,500కు పైగా ఇళ్ల నిర్మాణాలు పూర్తయ్యాయని మంత్రి వెల్లడించారు. మిగిలిన ఇళ్ల నిర్మాణాలను కూడా వేగంగా పూర్తి చేయాలని అధికారులకు సూచించారు. త్వరలో రెండో విడత ఇందిరమ్మ ఇళ్లను మంజూరు చేస్తామని తెలిపారు. ఇందిరమ్మ ఇంట్లోనే దీపావళి వేడుకలు జరుపుకోవడం ఆనందంగా ఉందన్నారు.

ఇటీవల అవార్డు అందుకున్న వింజపల్లి గ్రామ సర్పంచ్‌కు మంత్రి శుభాకాంక్షలు తెలిపారు. గౌరవెల్లి ప్రాజెక్టు నిర్మాణం కోసం గ్రామం నుంచి భూములు ఇచ్చిన రైతులకు కృతజ్ఞతలు తెలియజేశారు. గౌరవెల్లి ప్రాజెక్టు పూర్తయితే ఈ ప్రాంతం సస్యశ్యామలం అవుతుందని పేర్కొన్నారు.

ఈ కార్యక్రమంలో గ్రామ సర్పంచ్ అన్నాడి శ్రీజ జీవన్ రెడ్డి, మార్కెట్ కమిటీ చైర్మన్ నిర్మల జయరాజ్, వివిధ గ్రామాల సర్పంచులు, ప్రజాప్రతినిధులు, ముఖ్య నాయకులు, అధికారులు, స్థానికులు పాల్గొన్నారు.