ప్రజా సమస్యల పరిష్కారమే కాంగ్రెస్ ప్రభుత్వ ధ్యేయం: మంత్రి జీ. వివేక్ వెంకటస్వామి

హైదరాబాద్, ఏప్రిల్ 19:
రాష్ట్రంలో కాంగ్రెస్ ప్రభుత్వం ప్రజా సమస్యల పరిష్కారానికే ప్రాధాన్యత ఇస్తూ పనిచేస్తోందని రాష్ట్ర కార్మిక, ఉపాధి మరియు గనుల శాఖ మంత్రి జీ. వివేక్ వెంకటస్వామి తెలిపారు. ప్రజల అవసరాలను దృష్టిలో ఉంచుకుని సంక్షేమం, అభివృద్ధి కార్యక్రమాలను ముందుకు తీసుకెళ్తున్నామని ఆయన పేర్కొన్నారు.

రాష్ట్రంలో కాంగ్రెస్ పార్టీకి ప్రజల మద్దతు రోజురోజుకు పెరుగుతోందని, పార్టీలో చేరుతున్న ప్రతి ఒక్కరినీ స్వాగతిస్తున్నామని మంత్రి అన్నారు. మహిళల సంక్షేమం, సాధికారతకు ప్రభుత్వం ప్రత్యేక ప్రాధాన్యత ఇస్తోందని చెప్పారు. మహిళలకు ఉచిత బస్సు ప్రయాణం కోసం గత రెండు సంవత్సరాల్లో సుమారు రూ.9 వేల కోట్లు కేటాయించినట్లు వెల్లడించారు.

సిద్దిపేటలో కాంగ్రెస్ పార్టీ కార్యాలయ ప్రారంభ కార్యక్రమంలో మాట్లాడుతూ, మహిళాశక్తిని ప్రోత్సహించేందుకు వడ్డీలేని రుణాలు, బ్యాంకు లింకేజీ పథకాల కింద రూ.23 వేల కోట్లు కేటాయించినట్లు మంత్రి తెలిపారు. మహిళా సాధికారతే ప్రభుత్వ లక్ష్యమని స్పష్టం చేశారు.

గత భారత రాష్ట్ర సమితి ప్రభుత్వంపై విమర్శలు గుప్పిస్తూ, మిగులు బడ్జెట్‌తో ఉన్న రాష్ట్రాన్ని సుమారు రూ.8 లక్షల కోట్ల అప్పుల్లోకి నెట్టిందని ఆరోపించారు. గతంలో తీసుకున్న అప్పులపై ప్రతి నెల వేల కోట్ల రూపాయలు వడ్డీ చెల్లింపులకు వెళ్తున్నాయని అన్నారు.

రాబోయే బడ్జెట్‌లో కొత్తగా 2 లక్షల మందికి పెన్షన్లు మంజూరు చేయనున్నట్లు మంత్రి వెల్లడించారు. కల్వకుంట్ల చంద్రశేఖర్ రావు హయాంలో కాళేశ్వరం ప్రాజెక్టు పేరిట లక్ష కోట్ల రూపాయలు వృథా చేశారని, వాటిపై ఇప్పటికీ సుమారు రూ.20 వేల కోట్లు వడ్డీగా చెల్లిస్తున్నామని విమర్శించారు. అదే మొత్తంతో ప్రతి నియోజకవర్గంలో 500 పడకల ప్రభుత్వ ఆసుపత్రులు నిర్మించవచ్చని వ్యాఖ్యానించారు.

అలాగే, బీఆర్ఎస్ పాలనలో వందల ఎకరాల భూములు అక్రమంగా కబ్జా అయ్యాయని మంత్రి ఆరోపించారు. సిద్దిపేట నియోజకవర్గానికి ఇప్పటికే 3,500 ఇందిరమ్మ ఇళ్లు మంజూరు చేసినట్లు, త్వరలో మరో 3,500 ఇళ్లు కూడా అర్హులైన నిరుపేదలకు అందజేయనున్నట్లు తెలిపారు.