తెలంగాణలో కనీస వేతనాల అమలు దేశానికి రోల్ మోడల్: మంత్రి వివేక్ వెంకటస్వామి

హైదరాబాద్: తెలంగాణలో కనీస వేతనాల అమలు దేశానికి రోల్ మోడల్‌గా నిలిచిందని శక్తి, గనుల శాఖ మంత్రి వివేక్ వెంకటస్వామి అన్నారు. అసెంబ్లీలో పలువురు సభ్యులు అడిగిన ప్రశ్నలకు ఆయన సమాధానమిస్తూ.. రాష్ట్రంలోని కార్మికుల సంక్షేమం కోసం కాంగ్రెస్ ప్రభుత్వం పలు కీలక నిర్ణయాలు తీసుకుందని తెలిపారు.

తెలంగాణలో వివిధ పరిశ్రమలు, సంస్థల్లో 1.10 కోట్లకు పైగా కార్మికులు పనిచేస్తున్నారని మంత్రి వెల్లడించారు. కార్మికుల సంక్షేమాన్ని దృష్టిలో పెట్టుకుని కనీస వేతనాలను పెంచాలని ప్రభుత్వం నిర్ణయించిందని చెప్పారు. 2026 జూన్ 1 నుంచి రాష్ట్రంలో కొత్త కనీస వేతనాలు అమల్లోకి వచ్చాయని తెలిపారు.

కనీస వేతనాల పెంపుపై క్యాబినెట్ సబ్ కమిటీ ద్వారా నిర్ణయం తీసుకున్నామని, పరిశ్రమల ప్రతినిధులతో చర్చించిన అనంతరం కొత్త వేతనాలను ఖరారు చేశామని మంత్రి వివరించారు. కార్మికుల సంక్షేమం ప్రభుత్వ బాధ్యత అని, అదే సమయంలో పరిశ్రమల ప్రతినిధులు వ్యక్తం చేసిన అభ్యంతరాలను కూడా ప్రభుత్వం పరిగణనలోకి తీసుకుందని చెప్పారు.

100 శాతం అమలుకు చర్యలు

రాష్ట్రంలో కనీస వేతనాలు 100 శాతం అమలయ్యేలా చర్యలు తీసుకుంటామని మంత్రి స్పష్టం చేశారు. NTPC, సింగరేణి తదితర సంస్థల్లో కనీస వేతనాల అమలుపై వచ్చిన అంశాలను పరిశీలిస్తామని తెలిపారు. రామగుండం మున్సిపాలిటీ, NTPC కేటగిరీకి సంబంధించిన అంశాన్ని కూడా పరిశీలిస్తామని చెప్పారు.

సింగరేణిలో కాంట్రాక్ట్ కార్మికుల వేతనాల పెంపు అంశంపై ఎనర్జీ శాఖతో చర్చిస్తామని మంత్రి వెల్లడించారు. గ్రామ పంచాయతీల్లో కనీస వేతనాల అమలుపై వచ్చిన ఫిర్యాదులను పరిశీలించి తగిన చర్యలు తీసుకుంటామని హామీ ఇచ్చారు.

అవుట్‌సోర్సింగ్ ఉద్యోగుల కోసం కార్పొరేషన్

అవుట్‌సోర్సింగ్ ఉద్యోగుల సమస్యల పరిష్కారం కోసం అవుట్‌సోర్సింగ్ ఎంప్లాయీస్ కార్పొరేషన్ ఏర్పాటు చేసే అంశంపై ప్రభుత్వం సానుకూలంగా ఉందని వివేక్ వెంకటస్వామి తెలిపారు. కార్పొరేషన్ ఏర్పాటుపై త్వరలో సమావేశం నిర్వహిస్తామని చెప్పారు.

అవుట్‌సోర్సింగ్ ఉద్యోగుల సమస్యలపై ఇప్పటికే కమిటీ ఇచ్చిన సూచనలను ప్రభుత్వం పరిశీలిస్తుందని, అహ్మద్ నదీమ్ చైర్మన్‌గా ఉన్న కమిటీ సిఫార్సుల ఆధారంగా తదుపరి నిర్ణయాలు తీసుకుంటామని మంత్రి వెల్లడించారు.

సిర్పూర్ పేపర్ మిల్లు సమస్యపై కోర్టు నిర్ణయం తర్వాతే చర్యలు

సిర్పూర్ పేపర్ మిల్లులో కార్మికుల సమస్యకు సంబంధించిన కేసు ప్రస్తుతం కోర్టులో పెండింగ్‌లో ఉందని మంత్రి తెలిపారు. కోర్టు నిర్ణయం వెలువడే వరకు ప్రభుత్వం తుది నిర్ణయం తీసుకునే పరిస్థితి లేదని స్పష్టం చేశారు.

ఈ అంశంపై న్యాయవాదులతో సమావేశమై సమస్యను పరిశీలించే ప్రయత్నం చేస్తామని చెప్పారు. కోర్టు నుంచి క్లియరెన్స్ వచ్చిన అనంతరం ఎన్నికల నిర్వహణకు సంబంధించి అవసరమైన చర్యలు తీసుకుంటామని మంత్రి వెల్లడించారు.

తెలంగాణ కనీస వేతనాల విధానాన్ని ILO ప్రశంసించింది

దేశంలో ఎక్కడా లేని విధంగా తెలంగాణలో కనీస వేతనాల అమలు జరుగుతోందని మంత్రి వివేక్ వెంకటస్వామి అన్నారు. తెలంగాణ ప్రభుత్వం తీసుకొచ్చిన కనీస వేతనాల జీవోను అంతర్జాతీయ కార్మిక సంస్థ (ILO) ప్రశంసించిందని తెలిపారు.

తెలంగాణ తరహా కనీస వేతనాల విధానాన్ని ఇతర రాష్ట్రాలు కూడా అమలు చేయాలని ILO సూచించిందని మంత్రి పేర్కొన్నారు. కార్మికుల హక్కులు, సంక్షేమాన్ని కాపాడుతూ కనీస వేతనాల అమలును మరింత పటిష్టం చేస్తామని ఆయన స్పష్టం చేశారు.