పేదల సంక్షేమమే ప్రభుత్వ ధ్యేయం

630 మంది నిరుపేదలకు ఇందిరమ్మ ఇళ్ల మంజూరు పత్రాలు

412 మంది లబ్ధిదారులకు రూ.4.12 కోట్ల కళ్యాణలక్ష్మి, షాదీ ముబారక్ చెక్కుల పంపిణీ

లబ్ధిదారులకు పత్రాలు, చెక్కులు అందజేసిన మంత్రి వివేక్ వెంకటస్వామి

నర్సాపూర్, నవంబర్ 9: పేద ప్రజల సంక్షేమమే ప్రభుత్వ ప్రధాన ధ్యేయమని శక్తి, గనుల శాఖ మంత్రి గడ్డం వివేక్ వెంకటస్వామి అన్నారు. అర్హులైన ప్రతి పేద కుటుంబానికి ప్రభుత్వ సంక్షేమ పథకాల ప్రయోజనాలు అందించడమే లక్ష్యంగా ప్రజా ప్రభుత్వం పనిచేస్తోందని తెలిపారు.

సోమవారం నర్సాపూర్ మండలం తుల్జారాంపేట గ్రామ పంచాయతీ నూతన భవనాన్ని మంత్రి ప్రారంభించారు. అనంతరం నర్సాపూర్ మున్సిపాలిటీ పరిధిలోని ఓ ప్రైవేట్ ఫంక్షన్ హాల్‌లో ఎమ్మెల్యే వాకిటి సునీతా లక్ష్మారెడ్డి, జిల్లా కలెక్టర్ ప్రతిమా సింగ్‌తో కలిసి ఇందిరమ్మ ఇళ్ల మంజూరు పత్రాలు, కళ్యాణలక్ష్మి, షాదీ ముబారక్ చెక్కుల పంపిణీ కార్యక్రమంలో పాల్గొన్నారు.

ఈ సందర్భంగా గుడిసెల్లో నివసిస్తున్న అత్యంత నిరుపేద కుటుంబాలకు చెందిన 630 మంది లబ్ధిదారులకు ఇందిరమ్మ ఇళ్ల మంజూరు పత్రాలను అందజేశారు. అదేవిధంగా 412 మంది లబ్ధిదారులకు రూ.4,12,47,792 విలువైన కళ్యాణలక్ష్మి, షాదీ ముబారక్ చెక్కులను పంపిణీ చేశారు.

ఈ సందర్భంగా మంత్రి వివేక్ వెంకటస్వామి మాట్లాడుతూ.. సొంత ఇల్లు లేని నిరుపేద కుటుంబాల కలను సాకారం చేసేందుకు ప్రభుత్వం ఇందిరమ్మ ఇళ్ల పథకాన్ని అమలు చేస్తోందని తెలిపారు. అర్హులైన లబ్ధిదారులు ప్రభుత్వ మార్గదర్శకాలకు అనుగుణంగా ఇంటి నిర్మాణ పనులు చేపట్టి పథకాన్ని సద్వినియోగం చేసుకోవాలని సూచించారు.

ఆర్థికంగా వెనుకబడిన కుటుంబాల్లో ఆడపిల్లల వివాహాలు భారంగా మారకుండా ఆర్థిక భరోసా కల్పించేందుకు కళ్యాణలక్ష్మి, షాదీ ముబారక్ పథకాలను అమలు చేస్తున్నట్లు చెప్పారు. అర్హులైన ప్రతి ఒక్కరికీ సంక్షేమ పథకాల ప్రయోజనాలు అందేలా ప్రభుత్వం చర్యలు తీసుకుంటోందన్నారు.

రాష్ట్రంలో జీరో విద్యుత్ బిల్లులు, సన్నబియ్యం పంపిణీ, నూతన పెన్షన్లు, మహాలక్ష్మి పథకం వంటి కార్యక్రమాల ద్వారా పేదలకు ప్రభుత్వం అండగా నిలుస్తోందని మంత్రి తెలిపారు. రాష్ట్రవ్యాప్తంగా 20 లక్షల మంది విద్యార్థులకు సీఎం బ్రేక్‌ఫాస్ట్ అందిస్తున్నామని చెప్పారు. యువతకు నైపుణ్య శిక్షణతో పాటు ఉపాధి అవకాశాలు కల్పించేందుకు అడ్వాన్స్‌డ్ టెక్నాలజీ సెంటర్లను ఏర్పాటు చేస్తున్నట్లు వివరించారు.

ప్రభుత్వ సంక్షేమ పథకాలను అర్హులైన ప్రతి ఒక్కరూ సద్వినియోగం చేసుకోవాలని కోరారు. ప్రజల జీవన ప్రమాణాలను మెరుగుపరచడం, పేద కుటుంబాలకు ఆర్థిక భరోసా కల్పించడం ప్రభుత్వ ప్రధాన లక్ష్యమని స్పష్టం చేశారు.

అనంతరం నర్సాపూర్ మున్సిపాలిటీ పరిధిలోని 3వ వార్డులో నిర్వహించిన ఇందిరమ్మ ఇళ్ల గృహప్రవేశ కార్యక్రమంలో మంత్రి పాల్గొన్నారు.

ఈ కార్యక్రమంలో గ్రంథాలయ సంస్థ చైర్‌పర్సన్ సుహాసిని రెడ్డి, మున్సిపల్ చైర్‌పర్సన్ లక్ష్మి రాజు యాదవ్, నర్సాపూర్ ఆర్డీవో రామకృష్ణ, హౌసింగ్ పీడీ మాణిక్యం, తహసీల్దార్ శ్రీనివాస్, ప్రజాప్రతినిధులు, సంబంధిత శాఖల అధికారులు, లబ్ధిదారులు తదితరులు పాల్గొన్నారు.