మేనిఫెస్టో హామీలను ఒక్కొక్కటిగా అమలు చేస్తున్నాం
అర్హులైన పేదలందరికీ సంక్షేమ పథకాలు అందించడమే ప్రభుత్వ లక్ష్యం
శక్తి, గనుల శాఖ మంత్రి వివేక్ వెంకటస్వామి
పటాన్చెరు, నవంబర్ 19: గత పదేళ్లుగా కొత్త పింఛన్ల కోసం ఎదురుచూస్తున్న అర్హులకు ప్రజా ప్రభుత్వం అండగా నిలుస్తోందని శక్తి, గనుల శాఖ మంత్రి డాక్టర్ గడ్డం వివేక్ వెంకటస్వామి అన్నారు. పేదలు, వితంతువులు, ఒంటరి మహిళలు, దివ్యాంగులు, గీత కార్మికులు, చేనేత కార్మికుల సంక్షేమమే లక్ష్యంగా ప్రభుత్వం పనిచేస్తోందని తెలిపారు.
బుధవారం సంగారెడ్డి జిల్లా పటాన్చెరు నియోజకవర్గంలో నిర్వహించిన కార్యక్రమంలో కొత్తగా ఎంపికైన లబ్ధిదారులకు మంత్రి చేయూత పింఛన్ మంజూరు పత్రాలను పంపిణీ చేశారు. ఈ సందర్భంగా ఆయన మాట్లాడుతూ కాంగ్రెస్ పార్టీ ఎన్నికల మేనిఫెస్టోలో ఇచ్చిన హామీలను ఒక్కొక్కటిగా అమలు చేస్తున్నామని చెప్పారు. గత ప్రభుత్వం చేసిన అప్పులకు ఏటా సుమారు రూ.80 వేల కోట్ల వడ్డీలు చెల్లించాల్సి వస్తున్నప్పటికీ, ఆర్థిక ఇబ్బందులను అధిగమిస్తూ సంక్షేమ పథకాలను కొనసాగిస్తున్నామని వివరించారు.
రాష్ట్రవ్యాప్తంగా కొత్తగా సుమారు 4 లక్షల మందికి పింఛన్లు అందిస్తున్నామని, సంగారెడ్డి జిల్లాలో 18,591 మందికి, పటాన్చెరు నియోజకవర్గంలో 3,350 మందికి కొత్తగా పింఛన్లు మంజూరు చేసినట్లు వెల్లడించారు.
ప్రభుత్వం 200 యూనిట్ల ఉచిత విద్యుత్, మహిళలకు ఉచిత బస్సు ప్రయాణం, సన్నబియ్యం పంపిణీ, ఇందిరమ్మ ఇళ్లు, రాజీవ్ ఆరోగ్యశ్రీ కింద రూ.10 లక్షల వరకు వైద్యసాయం వంటి పథకాలను అమలు చేస్తోందని తెలిపారు. మహిళల ఉచిత బస్సు ప్రయాణం కోసం ఇప్పటివరకు ఆర్టీసీకి సుమారు రూ.12 వేల కోట్లు చెల్లించినట్లు పేర్కొన్నారు. మేనిఫెస్టోలో లేకపోయినా పేదలకు నాణ్యమైన ఆహారం అందించాలనే ఉద్దేశంతో సన్నబియ్యం పంపిణీ చేపట్టామని చెప్పారు.
విద్యార్థులు ఆకలితో పాఠశాలలకు వచ్చే పరిస్థితి ఉండకూడదనే లక్ష్యంతో సీఎం బ్రేక్ఫాస్ట్ పథకాన్ని ప్రారంభించామని మంత్రి తెలిపారు. రాష్ట్రవ్యాప్తంగా సుమారు 20 లక్షల మంది విద్యార్థులకు ఈ పథకం ద్వారా ప్రయోజనం కలగనుందని చెప్పారు. పటాన్చెరు నియోజకవర్గంలోనూ ఈ పథకాన్ని ప్రారంభించామని, త్వరలో సంగారెడ్డి జిల్లాలోని మరిన్ని పాఠశాలలకు విస్తరిస్తామని వెల్లడించారు.
పటాన్చెరు నియోజకవర్గంలో రూ.200 కోట్లతో యంగ్ ఇండియా ఇంటిగ్రేటెడ్ స్కూల్ ఏర్పాటు చేయనున్నట్లు తెలిపారు. ప్రజలకు ఆర్థిక భద్రత కల్పించేందుకు ప్రభుత్వం ఇందిరమ్మ కుటుంబ బీమా పథకాన్ని తీసుకొస్తోందని చెప్పారు. ఈ నెల 19న సిద్దిపేటలో ముఖ్యమంత్రి రేవంత్ రెడ్డి ఈ పథకాన్ని ప్రారంభించనున్నారని, ప్రమాదవశాత్తు కుటుంబ పెద్దను కోల్పోయిన పేద కుటుంబాలకు రూ.5 లక్షల వరకు బీమా రక్షణ కల్పించడం ద్వారా భరోసా లభిస్తుందని పేర్కొన్నారు.
ఎల్నినో ప్రభావంతో ఆశించిన స్థాయిలో వర్షాలు కురవక నీటి లభ్యత తగ్గిందని మంత్రి తెలిపారు. వచ్చే ఏడాది జూన్ వరకు తాగునీరు, సాగునీటి అవసరాల కోసం నీటిని పొదుపుగా వినియోగించుకోవాలని ప్రజలకు సూచించారు. అవసరానికి మించి విద్యుత్ వినియోగించవద్దని, నీటి లభ్యతను దృష్టిలో ఉంచుకుని వరి సాగు విస్తీర్ణాన్ని నియంత్రించుకోవాలని రైతులను కోరారు. కరోనా సమయంలో ప్రభుత్వానికి సహకరించినట్లుగానే ప్రస్తుత పరిస్థితుల్లోనూ ప్రజలంతా బాధ్యతగా వ్యవహరించాలని విజ్ఞప్తి చేశారు.
ఈ కార్యక్రమంలో పటాన్చెరు కాంగ్రెస్ పార్టీ నియోజకవర్గ ఇన్చార్జి కాటా శ్రీనివాస్ గౌడ్, నీలం మధు, జిల్లా కలెక్టర్ ప్రతీక్ జైన్, జాయింట్ కలెక్టర్, ప్రజాప్రతినిధులు, స్థానిక నాయకులు, అధికారులు, పింఛన్ లబ్ధిదారులు పాల్గొన్నారు.
